"मला माझे दात खूप पिवळे वाटतात. साफ करायचे आहेत."
ही बऱ्याच पेशंट ची 'चीफ कंप्लेंट' म्हणजेच डेंटल चेअर वर बसल्यावर समस्या सांगतानाचं पाहिलं वाक्य असतं. तसं बघायला गेलं तर मला पेशंट ने क्लिनिक मध्ये येऊन फक्त त्याला होणारा त्रास सांगणं अपेक्षित आहे. 'दात पिवळे वाटतात' हा होणारा त्रास आणि त्या बरोबर च 'दात साफ करायचे आहेत' ही ट्रीटमेंट पेशंट स्वतः च सांगून पार होतात. मग माझी प्रश्नावली चालू होते.
"तुम्हाला कोणी सांगितलय का की तुमचे दात पिवळे आहेत?" मी.
"नाही. मलाच जाणवतात. आरशात पाहिल्यावर असं वाटतं."
"याच्या पहिले कधी दात साफ केलेत का?"
" नाही. पहिल्यांदाच डेंटल क्लिनिक मध्ये पाऊल ठेवल आहे. मी असं पण कधी डॉक्टर कडे जात नाही. कधी आजारीच नाही पडत ना! साधी कोणती गोळी चालू नाही मला. हे दात च थोडे पिवळे वाटतात. विचार केला साफ करून घेऊ."
"मग तुम्हाला कोणी सांगितलय का की दात साफ केले की पांढरे होतात?"
" नाही. असं कोणी सांगितलं नाही पण दात साफ केले तर पांढरे तर दिसतीलच ना?"
"चला तुमचे दात चेक करू पहिले. मग मी तुम्हाला सांगते तुमचे दात साफ केल्यावर पांढरे दिसतील की नाही ते." या वाक्यानंतर माझं काम चालू होतं. नाही नाही.... चेक अप करून ट्रीटमेंट करायचं नाही तर दात साफ करणे आणि दात पांढरे करणे यात काय फरक आहे ते पेशंट ला समजवायचं काम.
दातांवर प्लाक, कॅलकुलस जमला म्हणजेच साध्या भाषेत सांगायचं तर घाण जमली आणि ती कडक झाली की दात साफ करावे लागतात.

याला स्केलिंग किंवा दात साफ करणे असे म्हणतात. या ट्रीटमेंट मध्ये तुमच्या दाताची ओरिजनल शेड परत येते कारण दातांवर कडक झालेल्या घाणीचा रंग हा शक्यतो पिवळा असतो. कधी कधी तो लाल किंवा काळा पण असू शकतो.
स्केलींग ने चहा काॅफी, तंबाखू, काही प्रकारचे मेडिसिन यांनी दातांवर पडलेले डाग सुद्धा निघून जातात आणि दात स्वच्छ दिसतात.
पण दातांवर पडलेले काही डाग असे असतात की जे स्केलिंग करून किंवा दात साफ करून निघत नाही.
. अशावेळी दातांवरचे डाग घालवण्यासाठी डेंटल ब्लिचिंग करावी लागते. याच ट्रीटमेंटचा म्हणजेच डेंटल ब्लिचिंग चा उपयोग करून आपण आपले दात पांढरे शुभ्र करू शकतो.
डेंटल ब्लिचिंग म्हणजे काय?
डेंटल ब्लिचिंग ही एक अशी ट्रीटमेंट आहे ज्यात दात सध्या आहेत त्या दाताच्या शेडपेक्षा चार शेड अधिक पांढरे दिसू शकतात.
दातांवरचे 'इंटरनल स्टेन्स' म्हणजेच दातांवरील जे डाग स्केलिंग करून जात नाही असे डाग डेंटल ब्लिचिंग करून काढून टाकता येऊ शकतात. यामध्ये दाताची वरवर स्वच्छता न करता त्याची शेड आत मधून बदलली जाते.
डेंटल ब्लिचिंग चा इफेक्ट नेहमीसाठी म्हणजेच परमनंट आहे का?
नाही. डेंटल ब्लिचिंग चा इफेक्ट हा काही कालावधीसाठी म्हणजे दाहा ते बारा महिन्यासाठी असू शकतो. यानंतर दातांची ओरिजनल शेड परत येणे चालू होते. परत दात पांढरे करायचे असल्यास पुन्हा डेंटल ब्लिचिंग करावे लागते.
डेंटल ब्लिचिंग केल्यावर काय खबरदारी घ्यावी लागते?
आपले भारतीय अन्नपदार्थांमध्ये हळद मसाले यांचा भरपूर वापर केला जातो. याचा दातांवर परिणाम होतो. स्वयंपाकात अश्या गोष्टींचा वापर जेवढा कमी करता येईल तेवढा करावा. डेंटल ब्लिचिंग केल्यानंतर काही लोकांना सेन्सिटिव्हिटी जाणवते. त्यांनी सेन्सिटिव्ह टूथपेस्ट चा वापर करावा. खूप जास्त थंड व खूप जास्त गरम अन्नपदार्थ टाळावेत.
डेंटल ब्लिचिंग कोणी करावे?
सुंदर हास्य हा आपल्या व्यक्तीमत्त्वाचा अविभाज्य भाग आहे. स्माईल चांगली असल्यास दुसऱ्यांवर चांगली छाप पाडता येते. ज्यांना दात पिवळे असल्यामुळे दिलखुलास हसायची लाज वाटते, ज्यांचा कामानिमित्त किंवा इतर काही कारणांनी बऱ्याच लोकांशी संपर्क येतो ते डेंटल ब्लिचिंग करून घेऊ शकतात. बरेच नट- नट्या डेंटल ब्लिचिंग करतात. लग्नासारखी मोठी गोष्ट असल्यास नवरा नवरी डेंटल ब्लिचिंग करण्यास महत्व देतात. आजकालच्या स्पर्धात्मक युगात कोणीही ही ट्रीटमेंट करून घेऊ शकतात.
या लेखातून मी दात साफ करणे म्हणजेच दात पांढरे करणे असा बऱ्याच लोकांचा असलेल्या गैरसमज दूर करण्याचा प्रयत्न केलेला आहे. खूपदा दात साफ केल्यानंतर स्वच्छ झाल्यामुळे ते पांढरे दिसतात पण नेहमीच असं नसतं. यामुळे दात साफ करायला आलेल्या पेशंटचा भ्रमनिरास होऊ शकतो. असं होऊ नये म्हणून मी हा थोडासा प्रयत्न केला आहे.
हा लेख कसा वाटला जरूर कळवा. दातांबद्दल अजून काही माहिती हवी असल्यास कमेंट बॉक्समध्ये लिहून मला पाठवा. धन्यवाद.
डॉ. स्मितल नितीन पवार
उज्वल दातांचा दवाखाना
नाशिक
8421755997
मला फेसबुक वर फॉलो करा
Facebook Ujjwal Dental Clinic
मला Linkedin वर फॉलो करा
कोणत्याही टिप्पण्‍या नाहीत:
टिप्पणी पोस्ट करा
Please do not enter irrelevant comment.